Manifestacion cultural riba Dia di Betico tabata exitoso

A pone hopi enfasis riba baile e anja aki, durante e manifestacion cultural riba Plaza Betico Croes. Desde 6:30PM a cuminsa e manifestacion cultural den presencia di mandatarionan y invitadonan. Tabatin dos discurso, uno di Minister Michelle Hooyboer-Winklaar di Asuntonan Economico, Asuntonan Social y Cultura mientras cu pa famia Croes, tabata G.F. :Junior Croes cu a hiba palabra riba escenario.

E presentacionnan cu a sigui tabata e wals Libertad di Carmelo Heijer, baila pa e pareha Joan Becker y Virgilio Angela. A sigui despues un baile di Masiduri, di e wals Ken ta Rubiano. The Popcorn Dancers a baile un potpourie di tur loke ta di nos, sigui pa e grupo Pierewietje cu un potpourie di danza-tumba-wals.

Aileen Croes a interpreta su cancion Aruba noble patria, mientras cu Sunrise Dancers a baile un Polka alegre, Grupo Masiduri a baile un Mazurka La Simpatica. Mester bisa cu Bertha Wolff  tambe a hala masha atencion cu su cancion Un bon Rubiano. A sigui dos baile mas di Grupo Masiduri cu un baile di cinta riba ritmo di caha di orgel y e grupo Youth in action cu a baila un tumba.

Sharon Rose a interpreta un dansa titula Ban baila e dansa aki acompanja pa Masiduri (Baile expresivo). Tambe e mesun Sharon Rose a canta e cantica Nos Cultura. E grupo Sodo y Cuero a presenta Lamento Arubiano acompaña pa Masiduri (Baile Expresivo) y despues un tambu acompaNJa pa Fatme Riguad.

E evento a termina cu un presentacion carnavalesco di e grupo Masiduri cu un potpourie di tumbanan di antes sigui pa JenniVe Dancers cu carnaval show. E evento a cera cu presentacion di Youth Extreme hunto cu show di Carna Aruba.

Henter e celebracion riba Dia di Betico, den cual a tuma luga diferente evento den barionan y den museonan durante henter dia, sigui pa e acto protocolario riba Plaza Betico Croes pa na final cera e anochi cu un manifestacion cultural, tabata un exito rotundo.