Diahuebs awo 12 di Januari 2012 ta ultimo dia pa Inscribi pa Prins y Pancho Infantil/Hubenil y Grandi

Diabuebs awo 12 di Januari 2012 ta ultimo dia pa inscribi pa Prins y Pancho infantil/hubenil y grandi. Pa 7or di anochi Lot lo wordo tira na Oficina di Sac y eleccion ta tuma luga diasabra 14 Januari 2012 pa 7'or di anochi den Aruba Entertainment Center. Aki ta sigui algun punto importante cu mester tene cuenta cu nan durante presentacion di cada un participante. 

E participantenan mester tene cuenta cu e siguiente puntonan:

*con e participantenan ta subi stage y con nan ta introduci nan mes na e publico;

*con e participantenan ta haci nan presentacion completo riba stage;

*con e public o a ricibi nan presentacion;

*mester tin un mensahe cla den e presentacion;

*e publico mester compronde e mensahe;

*e contenido di e presentacion y e presentacion mester cana hopi bon den otro;

*e actuacion durante presentacion;

*e publico mester acepta e presentacion;

*e vocabulario uza durante e presentacion mester ta cla y tambe uzo di bon articulacion;

*e presentacion mester tin contenido comico/humoristico.

Mester tene cuenta tambe cu participantenan por perde punto si nan no mantene nan mes na e reglanan ricibi. Tene bon cuenta cu esakinan, por fabor lesa e reglanan ricibi. Asina ta cu e participantenan mester traha y presenta nan mes bon pa por logra e titulo maximo.

Sac kier a manda un invitacion general pa e pueblo carnavalesco pa bin apoya nan participante faborito y asina tambe yuda na engrandece nos dushi Carnaval.