DONATION DUNA NA EDMUND HARMS FOUNDATION FOR DI ORGANIZACION MOVEMBER

Edmund Harms Foundation, den persona di sra. Juliska Harms a keda masha contento y satisfecho cu un donacion cu nan a ricibi di e Organizacion Movember, cu ta existi pa varios anja na mundo, cu for di dos anja pasa ta funcionando na Hulanda y Aruba a doe mee e anja aki, pa medio di Robert Tromp. 

Robert Tromp a comenta cu su tata mes a fayece dos anja pasa di cancer y el a haya un ayudo hopi bon di e fundacion. Tromp na Hulanda a doe mee anja pasa cu Movember na Hulanda, y e anja aki atrobe, pero e fondonan recauda a bin pa Aruba pa Edmund Harms Foundation, locual Juliska Harms ta mira como un bunita gesto di duna algo bek. Movember tin e meta di concientiza e hendenan homber riba cancer di prostate, entre otro, y tambe di nan salud en general. Pa recauda fondo nan ta laga crece nan mustashi y despues nan ta bishita diferente barbershop pa corta nan mustashi y haya fondo. Nan ta haci un fiesta chikito y bisti elegantemente unda nan ta pasa di "Man" pa "Gentleman", y locual nan a colecta nan a trece Aruba pa e fundacion. E intencion ta pa na November 2012 bin Aruba haci algo similar, y haci donacion na diferente otro instancia cu ta traha na bienestar di nos comunidad. Tromp a bisa cu pa medio di e e-mail Movember.com tur persona interesa na duna un man cu donacion y aporta ideanan nobo, con nan por yuda comunidad, por contact e organizacion, y asina nan por contact e personanan tambe pa wak di ki manera nan por yuda. Di parti di sra. Juliska Harms, el a splica cu Edmund Harms Foundation tin 15 anja di existencia caba, brindando ayudo na pacientnan terminal di cancer, cual ta nan tarea y mision specifico, y e ta orguyoso di e bon y bunita trabao cu nan ta haciendo, y esaki e famianan di pacientenan mes ta demostra y ta duna un bon señal manera e hoben Tromp cu a pasa den experiencia cu su tata. E ta haya masha bon cu un grupo di hoben a bin for di Hulanda cu e donacion, despues di a dedica hopi ora na trabao prodeo, y cu a crea un website y un facebook, y cu a bin cu placa pa e fundacion, pero mas ainda cu nan ta un grupo di hoben cu kier yuda concientiza e ser masculino riba nan salud.