Aruba Lions club a anuncia su evento Sight First

Esaki lo ta nos prome evento pa e aña aki, asina Claret Lopez, Presidente di Aruba Lions Club a anuncia e prome evento cu e club di servicio ta organisa diabierna dia 27 di januari proximo. 

E charla Sight First ta tuma luga den ballroom di Marriott Resort y lo conta cu e orador invita Dr. Lucy Young, un oftalmologo Mericano gradua na Harvard University y ta reconoci mundialmente pa su experticio den topiconan relaciona cu Diabetis. Aruba Lions Club ta orguyoso di por anuncia, danki na nan propio fondo y cu sosten di patrocinadonan, cu ta logra organisa e evento aki den forma gratis dia 27 di januari 2012, cuminsando pa 8or di anochi den ballroom di Marriott Resort & Casino. Dr. Young lo elabora riba e tema di ‘Diabetic Retinopathy and its management’.

E evento ‘Sight First’ sigur ta uno di sumo importancia pa nos comunidad, ya cu ta trata e tema di bista, cu ta un di nos sintinan masha uza y cuida. Dr. Lucy Young, un oftalmologo Mericano y di excelente reputacion, lo fungi como orador invita durante e charla aki. Separa di ta un experto den operacion di cancer na cornea, el a haci hopi investigacion di e cornea en general. Dr. Young ta traha na Massachusetts Eye & Ear Infirmary y tin no menos di 22 aña di experiencia. Un di e motibonan pa perdida di bista ta relaciona cu nos edad.

E ta trece cune degeneracion macular y ta e causa principal di perdida di bista severo segun demografico. Pero un otro factor na Boston, cu ta similar cu Aruba ta, e epidemia di obesidad, ya cu esaki ta trece cu ne daño di capilar di retina, pero tambe por afecta bo riñon, curason y vaso di sanger den bo pianan. Tin varios recomendacion pero esunnan principal ta pa bisti un bril di solo UV-blocking, haci un chekeo basico ora bo yega e edad di 40 y mantene un dieta balansa cu ta inclui fish oils. “Sea bo ta diabetico of bo kier ta bon informa riba aspectonan di bo bista y salud en general, no perde e charla interesante aki.

Publico, dokternan y tur interesadonan riba e tema di diabetes y bo bista, ta invita pa atende na e charla aki cu Aruba Lions Club ta organisa den forma gratis na nos comunidad”, asina Claret Lopez di Aruba Lions Club a anuncia durante un conferencia di prensa teni den ballroom di Marriott Resort. Di e forma aki e club di servicio ta duna bek na comunidad, e mesun comunidad cu ta sostene henter aña den tur su esfuersonan pa recauda fondo. Aruba Lions Club ta un club di servicio cu ta existi pa 64 aña caba na Aruba y ta bon conoci riba nos isla pa su forma activo di yuda cu proyectonan pa comunidad. Anualmente e club ta genera mas o menos 1 miyon florin cu ta bay bek den comunidad a traves di un lista largo di organisacion y instancianan den necesidad.