SPLENDA,ANCHOR Y MANRIQUE CAPRILES TA TRECE E FINAL DI THE NEXT CHEF COMPETITION

Despues di 3 siman exitoso di e programa The Next Chef Competition awo ta yega su parti final pa e temporada aki. Esaki lo tuma luga diamars awo pa 10:10 di anochi durante e programa di Tabitha's TV Show riba Telearuba, canal 13, 23 y 313.
Cada siman e chef nan participando mester a mustra nan expertisio den cushina trahando diferente plato di aperitivo y dessert. Pa e anochi final e chef nan mester scoge un plato principal cu ta cuadra cu nan tema di anochi. Esaki lo consisti di lo siguiente:
• Dane Berkel cu su plato Fish Creole
• Josmar Kock cu su plato Fish Beurre Blanc
• Jean-Claude Werleman cu su plato Chicken Saltin Bocca
• Yesman Amaya cu su plato Sweet Chicken
• Derrick Bislick cu su plato Seafood Trio
Tur plato mester conten'e productonan Splenda y Anchor, cu ta e patrocinadornan principal di The Next Chef Competition.

Splenda, un "sweetener" deriva di sucu, ta wordo uza como un substituto di sucu. E no ta solamente pa pacient diabetico pero tambe pa esun cu kier tene peso controla, ya cu Splenda tin cero caloria.

E compania Vibration PR Company lo duna un premio na e chef cu a destaca mas cu su tema di anochi. E premio lo ensera atende y dirigi un evento cu Vibration PR Company ta organiza.

E anochi aki lo ta uno hopi exitante, tanto pa e chef nan participando como tur otro cu a yuda den organiza e programa, manera juffrouw nan di EPI Vanessa Loefstop y Zahaira Kelly cu a ofrece e cushina di e scol pa e competencia. Sin duda algun hopi lo ta cu nervio pero tambe exita pa por logra e meta final cu ta pa bira e Next Chef.